(1)మరీచి కొడుకు కశ్యప ప్రజాపతి. బ్రహ్మదేవుడి కుడి చేతి బొటన వేలి నుండి దక్షుడు అనే పురుషుడు, ఎడమచేతి బొటన వేలి నుండి ధరణి అనే స్త్రీ జన్మించారు. వారు ఇరువురికి వెయ్యి మంది మహా రుషులు జన్మించారు. (2)బ్రహ్మ మానస పుత్రులలో రెండవ వాడైన అంగిరుసున కు, ఉతధ్యుడు, బృహస్పతి, సంవర్తుడు అనే కొడుకులు పుట్టారు. బృహస్పతి దేవతలకు గురువు ఐనాడు. (3).అత్రి అనే మానసపుత్రునికి అనేక మంది మహా మునులు జన్మించారు.(4) పులస్త్యుడు అనే బ్రహ్మ మానసపుత్రునకు, రాక్షసులు జన్మించారు. (5)పులహుడు అనే మానస పుత్రునకు, కిన్నరలు, కింపురుషులు జన్మించారు.(6)క్రతువు అనే మాన సపుత్రునకు పక్షి జాతి పుట్టింది.

॥ శ్రీః ॥
12.1. అధ్యాయః 001
Mahabharata - Shanti Parva - Chapter Topics
గంగాతీరే బంధూనాం కృతోదకం యుధిష్ఠిరంప్రతి వ్యాసనారదాదిమహర్షీణాం సమాగమనం॥ 1॥
యుధిష్ఠిరేణ తత్ర నారదంప్రతి కర్ణవృత్తాంతకథనప్రార్థనా॥ 2॥
Mahabharata - Shanti Parva - Chapter Text

॥ శ్రీవేదవ్యాసాయ నమః।

నారాయణం నమస్కృత్య నరం చైవ నరోత్తమం।
దేవీం సరస్వతీం వ్యాసం తతో జయముదీరయేత్॥ 12-1-1(80862)
వైశంపాయన ఉవాచ।
కృత్వోదకం తే సుహృదాం సర్వేషాం పాండునందనాః।
విదురో ధృతరాష్ట్రశ్చ సర్వాశ్చ భరతస్త్రియః॥ 12-1-1x(6703)
తత్ర తే సుమహాత్మానో న్యవసన్కురునందనాః।
శౌచం నిర్వర్తయిష్యంతో మాసచ్చాత్రం బహిః పురాత్॥ 12-1-2(80863)
కృతోదకం తు రాజానం ధర్మాత్మానం యుధిష్ఠిరం।
అభిజగ్ముర్మహాత్మానః సిద్ధా బ్రహ్మర్షిసత్తమాః॥ 12-1-3(80864)
ద్వైపాయనో నారదశ్చ దేవలశ్చ మహానృషిః।
దేవస్థానశ్చ కణ్వశ్చ తేషాం శిష్యాశ్చ సత్తమాః॥ 12-1-4(80865)
అన్యే చ వేదవిద్వాంసః కృతప్రజ్ఞా ద్విజాతయః।
గృహస్థాః స్నాతకాః సంతో దదృశుః కురుసత్తమం॥ 12-1-5(80866)
తేఽభిగంయ మహాత్మానం పూజితాశ్చ యథావిధి।
ఆసనేషు మహార్హేషు వివిశుః పరమర్షయః॥ 12-1-6(80867)
ప్రతిగృహ్య తతః పూజాం తత్కాలసదృశీం తదా।
పర్యుపాంసన్యథాన్యాయం పరివార్య యుధిష్ఠిరం॥ 12-1-7(80868)
పుణ్యే భాగీరథీతీరే శోకవ్యాకులచేతసం।
ఆశ్వాసయంతో రాజేంద్రం విప్రాః శతసహస్రశః॥ 12-1-8(80869)
నారదస్త్వవ్రవీత్కాలే ధర్మపుత్రం యుధిష్ఠిరం।
సంభాష్య మునిభిః సార్ధం కృష్ణద్వైపాయనాదిభిః॥ 12-1-9(80870)
నారద ఉవాచ। 12-1-10x(6704)
పార్థస్య బాహువీర్యేణ ప్రసాదాన్మాధవస్య చ।
జితా సేయం మహీ కృత్స్నా ధర్మేణ చ యుధిష్ఠిర॥ 12-1-10(80871)
దిష్ట్యా ముక్తాః స్థ సంగ్రామాదస్మాల్లోకభయంకరాత్।
క్షత్రధర్మరతశ్చాసి కచ్చిన్మోదసి పాండవ॥ 12-1-11(80872)
కచ్చిచ్చ నిహతామిత్రః ప్రీణాసి సుహృదో నృప।
కచ్చిచ్ఛ్రియమిమాం ప్రాప్య న త్వాం శోకః ప్రబాధతే॥ 12-1-12(80873)
యుధిష్ఠిర ఉవాచ। 12-1-13x(6705)
విజితేయం మహీ కృత్స్నా కృష్ణబాహుబలాశ్రయాత్।
బ్రాహ్మణానాం ప్రసాదేన భీమార్జునబలేన చ॥ 12-1-13(80874)
ఇదం తు మే మహద్దుఃఖం వర్తతే హృది నిత్యదా।
కృత్వా జ్ఞాతిక్షయమిమం మహాంతం ఘోరదర్శనం॥ 12-1-14(80875)
సౌభద్రం ద్రౌపదేయాంశ్చ ఘాతయిత్వా సుతాన్ప్రియాన్।
జయోఽయమజయాకారో భగవన్ప్రతిభాతి మే॥ 12-1-15(80876)
కింను వక్ష్యతి వార్ష్ణేయీ వధూర్మే మధుసూదనం।
ద్వారకావాసినీ కృష్ణమితః ప్రతిగతం హరిం॥ 12-1-16(80877)
ద్రౌపదీ హతపుత్రేయం కృపణా హతబాంధవా।
అస్మత్ప్రియహితే యుక్తా భూయః పీడయతీవ మాం॥ 12-1-17(80878)
ఇదమన్యచ్చ భగవన్యత్త్వాం వక్ష్యామి నారద।
మంత్రసంవరణేనాస్మి కుంత్యా దుఃఖేన యోజితః॥ 12-1-18(80879)
యః స నాగాయుతప్రాణో లోకేఽప్రతిరథో రణే।
సింహవిక్రాంతగామీ చ జితకాశీ యతవ్రతః॥ 12-1-19(80880)
ఆశ్రయో ధార్తరాష్ట్రాణాం మానీ తీక్ష్ణపరాక్రమః।
అమర్షీ నిత్యసంరంభీ క్షేప్తాఽస్మాకం రణేరణే॥ 12-1-20(80881)
శీఘ్రాస్త్రశ్చిత్రయోధీ చ కృతీ చాద్భుతవిక్రమః।
గూఢోత్పన్నః సుతః కుంత్యా భ్రాతాఽస్మాకమసౌ కిల 12-1-21(80882)
తోయకర్మణి తం కుంతీ కథయామాస మే తదా।
పుత్రం సర్వగుణోయేతం కర్ణం త్యక్తం జలే పురా॥ 12-1-22(80883)
మంజూషాయాం సమాధాయ గంగాస్రోతస్యమజ్జయత్।
యం సూతపుత్రం లోకోఽయం రాధేయం చాభ్యమన్యత॥ 12-1-23(80884)
స సూర్యపుత్రః కుంత్యా యై భ్రాతాఽస్మాకం చ మాతృతః।
అజానతా మయా సడ్ఖ్యే రాజ్యలుబ్ధేన ఘాతితః।
తన్మే దహతి గాత్రాణి తూలరాశిమివానలః॥ 12-1-24(80885)
న హి తం వేద పార్థోఽపి భ్రాతరం శ్వేతవాహనః।
నాహం న భీమో న యమౌ స త్వస్మాన్వేద తత్వతః॥ 12-1-25(80886)
గతా కిల పృథా తస్య సకాశమితి నః శ్చుతం।
అస్మాకం శమకామా వై త్వం చ పుత్రో మమేత్యథ॥ 12-1-26(80887)
పృథాయా న కృతః కామస్తేన చాపి మహాత్మనా।
అతీవానుచితం మాతరవోచ ఇతి సోఽబ్రవీత్॥ 12-1-27(80888)
న హి శక్ష్యామి సంత్యక్తుమహం దుర్యోధనం రణే।
అనార్యత్వం నృశంసత్వం కృతఘ్నత్వం చ మే భవేత్॥ 12-1-28(80889)
యుధిష్ఠిరేణ సంధిం హి యది కుర్యాం మతే తవ।
భీతో రణే శ్వేతవాహాదితి మాం మంస్యతే జనః॥ 12-1-29(80890)
సోఽహం నిర్జిత్య సమరే విజయం సహకేశవం।
సంధాస్యే ధర్మపుత్రేణ పశ్చాదితి చ సోఽబ్రవీత్॥ 12-1-30(80891)
తమవోచత్కిల పృథా పునః పృథులవక్షసం।
చతుర్ణామభయం దేహి కామం యుధ్యస్వ ఫల్గునం॥ 12-1-31(80892)
సోఽబ్రవీన్మాతరం ధీమాన్వేపమానాం కృతాంజలిః।
ప్రాప్తాన్విషహ్యాంశ్చతురో న హనిష్యామి తే సుతాన్॥ 12-1-32(80893)
పంచైవ హి సుతా దేవి భవిష్యంతి తవ ధ్రువాః।
సార్జునా వా హతే కర్ణే సకర్ణా వా హతేఽర్జునే॥ 12-1-33(80894)
తం పుత్రగృద్ధినీ భూయో మాతా పుత్రమథాబ్రవీత్।
భ్రాతౄణాం స్వస్తి కుర్వీథా యేషాం స్వస్తి చికీర్షసి॥ 12-1-34(80895)
ఏవముక్త్వా కిల పృథా విసృజ్యోపయయౌ గృహాన్।
సోఽర్జునేన హతో వీరో భ్రాత్రా భ్రాతా సహోదరః॥ 12-1-35(80896)
న చైవ నిఃసృతో మంత్రః పృథాయాస్తస్య వా మునే।
అథ శూరో మహేష్వాసః పార్థేనాజౌ నిపాతితః॥ 12-1-36(80897)
అహం త్వజ్ఞాసిషం పశ్చాత్స్వసోదర్యం ద్విజోత్తమ।
పూర్వజం భ్రాతరం కర్ణం పృథాయా వచనాత్ప్రభో॥ 12-1-37(80898)
తేన మే దూయతే తీవ్రం హృదయం భ్రాతృఘాతినః।
కర్ణార్జునసహాయోఽహం జయేయమపి వాసవం॥ 12-1-38(80899)
సభాయాం క్లిశ్యమానస్య ధార్తరాష్ట్రైర్దురాత్మభిః।
సహసోత్పతితః క్రోధః కర్ణం దృష్ట్వా ప్రశాంయతి॥ 12-1-39(80900)
యదా హ్యస్య గిరో రూక్షాః శ్రృణోమి కటుకోదయాః।
సభాయాం గదతో ద్యూతే దుర్యోధనహితైషిణః॥ 12-1-40(80901)
తదా నశ్యతి మే రోషః పాదౌ తస్య నిరీక్ష్య హ।
కుంత్యా హి సదృశౌ పాదౌ కర్ణస్యేతి మతిర్మమ॥ 12-1-41(80902)
సాదృశ్యహేతుమన్విచ్ఛన్పృథాయాస్తస్య చైవ హ।
కారణం నాధిగచ్ఛామి కథంచిదపి చింతయన్॥ 12-1-42(80903)
కథం ను తస్య సంగ్రామే పృథివీ చక్రమగ్రసత్।
కథం ను శప్తో భ్రాతా మే తత్త్వం వక్తుమిహార్హసి॥ 12-1-43(80904)
శ్రోతుమిచ్ఛామి భగవంస్త్వత్తః సర్వం యథాతథం।
భవాన్హి సర్వవిద్విద్వాఁల్లోకే వేద కృతాకృతం॥ ॥ 12-1-44(80905)

ఇతి శ్రీమన్మహాభారతే శాంతిపర్వణి రాజధర్మపర్వణి ప్రథమోఽధ్యాయః॥ 1॥

Mahabharata - Shanti Parva - Chapter Footnotes

12-1-1 కృతోదకాస్తే ఇతి ఝ. పాఠః॥
12-1-2 తత్ర గంగాతీరే॥
12-1-8 ఆశ్వాసయంతః హేతౌ శతృప్రత్యయః।
ఆశ్వాసనార్థం పర్యుపాసన్నిత్యర్థః॥
12-1-16 వధూః కనిష్ఠభ్రాతృభార్యాత్వాత్స్నుషాభూతా।
వార్ష్ణేయీ సుభద్రా॥
12-1-18 మంత్రసంవరణేన గూఢోత్పన్నస్యాస్మద్భాతుః కర్ణస్యాప్రకాశేన॥
12-1-20 అమర్షీ పరోత్కర్షాసహిష్ణుః। నిత్యసంరంభీ సదా క్రోధవాన్॥
12-1-24 మాతృతః మాతృసంబంధేన॥
12-1-26 పాండవవత్ త్వం చ పుత్రో మభేత్యవ్రవీదితి శేషః॥
12-1-27 కామోఽభిలషితం॥
12-1-32 వధ్యాన్విషబహ్యానితి థ. పాఠఃo। విషహ్యాన్వశగాన్॥
12-1-35 విసృజ్య కర్ణమితి శేషః॥
12-1-43 చక్రం రథచక్రం॥
12-1-44 కృతం కార్యం। అకృతం కారణం॥

www.sanatanadharm.com - play store app (sanatana dharm)

"Bharathiya Sanatana Dharm" and Sanatana Dharmam & Dharmo rakshati Rakshitha logo are our trademarks. Unauthorised use of "Sanatana Dharmam & Dharmo rakshoati Rakshitha" and the logo is not allowed. Copyright © sanatanadharm.com All Rights Reserved . Made in India.